Nij elan en Belgen op de PC

Doe’t ik oan it begjin fan dit seizoen myn krityske kanttekens publisearre oer de FRIESLAND BANK CUP krige ik fuort en daliks fan immen út it KNKB kader de opmerking dat ik net mei problemen komme moast mar mei oplossings. Soks is fansels altiten in ‘deadogger’ want dan soenen je nea wer mei krityk komme kinne. Mar goed, it hat my dochs net loslitten en hjirûnder wol ik besykje om in bydrage te leverjen oan de diskusje wêr’t we mei it keatsen nei ta moatte.

1.      Oantal wedstriden

It is foar my dúdlik dat in protte keatsers, harren partners en ek guon âlders fan jeugdkeatsers muoite ha mei de ferplichting om elk wykein twa kear der op út te gean. Want je binne fansels wol de hiele dei kwyt! Ik pleitsje dan ek foar in wedstriidkalinder wêryn der foar de jeugd o/m 16 jier allinnich KNKB-wedstriden binne op sneon en allinnich KNKB-wedstriden foar 16+ op snein. Utsein in tal klassikers dy’t it bewys levere ha dat se besteansrjocht ha op in oare dei.

Foar- en neidielen:

Der binne foar alle kategoryen minder offisjele wedstriden. Ik tink dat benammen de jeugd dat net sa aardich fynt. Sy wolle oer it generaal best wol twa kear yn it wykein keatse. In oar neidiel is dat it punteklassemint troch it minder tal wedstriden yn relaasje ta oare generaasjes in fertekent byld jout. Mar dat liket my net sa wichtich. Ek yn it ferline wie it tal wedstriden net elk jier gelyk.

Foardielen binne der foar de keatsers en âlders dy’t op sneon graach noch wat tiid foar harren sels ha wolle. (It soe wol in ûndersyk wurdich wêze om in grut oantal (top)keatsers dy’t jong ophâlden binne te freegjen as se langer trochkeatst hienen as der allinnich KNKB-wedstriden west hienen op snein.)  

Ferienings kinne yn dy sitewaasje ek mear in berop dwaan op stipe by KNKB-wedstriden dy’t se sels organisearre. De jeugd kin op snein belutsen wurde by in haadklassepartij en 16-plussers by de organisaasje fan jeugdwedstriden op sneon.

2.      Wedstriidfoarmen

Der is in protte ferlet fan oare en nije wedstriidfoarmen en ek fan in wat minder stringe regeljouwing.  Ik soe de útdaging wol oandoarre om op sneon foar de keatsers fan 16+ alternative (keats)partijen te organisearjen. Mar dan partijen dy’t net falle ûnder de ‘ferplichtings’ fan de KNKB. Partijen dêr’t de feriening hielendal sels baas binne. Sjoch nei it sukses fan alternative wedstriidfoarmen sa as Lanenkaatsen, Zachte Bal PC, Horecapartij Ljouwert, Pelotekampioenskip yn Littens, Pelote PC yn Winsum en dan ha ik it noch net iens oer it bûnte ferskaat oan lokale partijen (‘Kippetjespartij’ mei sa’n 100 partoer!) en alternative wedstriidfoarmen as pearkekeatsen, teatsen, muorrekeatsen ensafuorthinne. De KNKB joech sels mei de FRIESLAND BANK CUP al oan dat se dy kant mear út wolle. Ek de diskusje oer wol/net in Bûnspartij op it Sjûkelân en it rûlearjen fan de JONG NEDERLÂN kin hjir yn meinommen wurde. 

Foar- en neidielen:

As neidiel sil de KNKB akseptearje moatte dat der mear (alternative) wedstriden komme dêr’t se gjin sizzenskip oer hawwe. Ferienings mei in spesifike partij op sneon of snein sille dy ynleverje moatte. (Jongespartij Frjentsjer, Lytse PC yn Mantgum en Van Aismapartij op sneon yn Bitgum etc.) Soks docht sear en sil in diskusje wurde mei in protte emoasje, mar it belang fan it keatsen is grutter dan it belang fan in lokale feriening.

Foardielen binne der foar keatsers mei in spesifyk talint of ûntwikkele feardichheid. Sy krije mear mooglikheden om him/har te ûntjaan. Foar ferienings lizze der ek nije kânsen om bûten it formele wedstriidroaster fan de KNKB alternative partijen te organisearjen.

3.      Mear ynternasjonale útwikselings

Yn it ferline wienen der gauris folle mear ien of twa daagse toernoaien mei Belgyske peloateploegen. Om’t ek it peloaten yn België yn in swiere dip sit, soe ik der foar fiele om mei de Belgen te oerlizzen as der ien of meardere kearen yn it jier yn de wedstriidroasters fan beide lannen tiid frij makke wurde kin foar sokke toernoaien. En ik soe sels de diskusje net út de wei gean wolle om it ek foar Belgen mooglik te meitsjen om - krekt as yn in fier ferline - mei te dwaan oan de PC.

4.      Mear gebrûk fan moderne media

 In pear jier ferlyn is der, nei myn betinken, suksesfol eksperimintearre mei internet-TV. De kwaliteit fan de útstjoerings wie net altiten geweldich, mar troch de ferbettere technyk is soks in kwestje fan tiid. Tink mar oan de útstjoerings fan Omrop Fryslân fan de lêste jierren en dy fan 20 jier ferlyn. Dei en nacht ferskil!

Boppedat is it in geweldige tsjinstferliening oan in grut tal keatsleafhawwers dy’t net by steat binne om live by in keatspartij te wezen. Tink oan Friezen om útens, mar ek âlderen, siken, minsken mei in handikap ensafuorthinne. Boppedat bin ik der fan oerstjûge dat mei profesjonele marketing soks ek noch finansjeel út kin.

 

Nijjierswinsk 2013

PC Moment

Jan Hospes vroeg een dezer dagen op facebook naar “het mooiste PC-moment”.  Tsja Jan, daar vraag je me wat! Ik heb me suf gepiekerd en verschillende momenten de revue laten passeren. Mooie momenten waren er veel, ontroerende en aangrijpende momenten ook.

Laten we beginnen met mijn jongste herinnering. Het was de overwinning van mijn ex-buurman Gerrit Langerak op de PC van 1965. Negen was ik en in de loop van de dag op de schouders van mijn vader meegetroond naar dé PC. De familie Langerak had naast ons gewoond aan De Leane in Franeker. Liggend langs de zijlijn was die dag de overwinning van “mijn buurman” ook heimelijk mijn overwinning. En dat noch wel met “alles aan de hang”. Van de wedstrijd heb ik niet veel onthouden, maar het gevoel van heroïek en de magie van de PC is vanaf dat moment nooit meer vertrokken.

Een bijzonder moment was ook het afscheid van Hotze Schuil op de PC in 1972. (Dit jaar precies 40 jaar geleden! ) De eerlijkheid gebied te zeggen dat ik door mijn leeftijd Hotze niet veel heb zien spelen, maar zijn roem was mij natuurlijk niet onbekend. En toen hij dan ook in 1972 op 46-jarige leeftijd door Robert van Wieren en Lammert Breuker werd gevraagd om met hen nog éénmaal op de PC te spelen, begreep ik dat het de laatste keer was dat ik hem zou zien acteren. Veel later zag ik mij zelf terug op een legendarische foto die op die dag van Hotze is gemaakt. Hotze is op die foto met het publiek in gesprek terwijl ik op de achtergrond tussen het publiek (1e rij 5e van rechts) geboeid zit te kijken naar een andere partij. Maar zijn afscheid op de PC is me altijd bij gebleven.

De mooiste finale die ik ooit heb gezien was die in 1984 tussen de parturen van Sake Saakstra, Johannes Brandsma en Piet Jetze Faber tegen Peter Rinia, Wybren (Wiep) van Wieren en Tunno Schurer. Deze laatsten wonnen nadat ze een voorsprong van 5-2 hadden verspeeld en pas wonnen met een volle telegraaf. De LC schreef zelfs over de “de finale van de eeuw”.  http://tinyurl.com/bujhjgy Het was een wedstrijd met prachtig spel, dynamiek en emotie. In ieder geval een partij die me altijd bij blijft qua spanning en lading. De stilte die er was op het moment dat de laatste bal werd opgeslagen en de ontlading bij publiek en winnaars nadat Van Wieren de bal voorbij de kaats sloeg, waren van een enorme intensiteit. Een partij die ik niet licht vergeet.

De koning die ik het meest zijn PC overwinning “gunde” was Johannes Dijkstra in 2003. “Lytse Johannes” kaatste al decennia lang en het grote succes was altijd weggebleven. Het jaar daarvoor moest het eigenlijk gebeuren toen hij met Sake Porte en Auke van der Graaf het toppartuur had om de PC te winnen. Maar het slaagde niet. Zijn kans leek voorbij. In een bol van emotie staande PC wist hij in 2003 met Karel Nijman en Folkert van der Weij de overwinning te behalen. http://tinyurl.com/cs89kme Emotierijk op verschillende fronten. In de partij tegen Rudmer van der Meer, Henk Vlietstra en Taeke Triemstra sloeg Johannes bij een achterstand van 5-4 en 6-6 een zeer gedurfde hoog opgeslagen zitbal net binnen de kwaadlijn. En in het laatste eerst miste Rudmer bij een voorsprong van 5-5 en 6-2 driemaal achter elkaar het perk. Ik heb nog nooit een kaatser zo teleurgesteld gezien als Henk Vlietstra. Hij zakte als een plumpudding in elkaar en bleef enkele momenten roerloos liggen. Hoe anders was de ontlading na de laatste slag in de finale bij het winnende outsiders partuur. Karel Nijman was door het dolle heen en “Lytse Johannes” was door tranen overmand toen zijn vader die juist weduwnaar was geworden als één van de eersten naar hem toe vloog. Mooie momenten zijn ontroerende en emotierijke momenten. Momenten die door hun lading blijven hangen in het geheugen en daar zorgen voor die altijd prachtige herinnering aan dé PC.

In frisse bal

Sport en spul gean spitigernôch te faak lykop. It begryp sportiviteit hat sûnt de Freule fan 1949 gâns oan gewicht en kleur ferlern. Op dy memorabele Freuledei joech Cor Binsma fan Huzum yn de finale tsjin Ljouwert op de stân fan 5-5 en 6-6 daliks ta dat hy by it foarbyslaan fan de bal dizze earst “oan han” hie. De slach wie ferlern en de partij ek, mar Binsma wie foar altiten winner fan ivige rom op it mêd fan sportiviteit. Sjoch: http://tinyurl.com/7og8c6t

Mar is it hjoed de dei no echt sa oars as eartiids mei it begryp sportiviteit? Ik tink it einliks net. It hinget gewoan ôf fan de persoan. Ek no ha je skelmers en dogenieten mar ek keatsers dy’t ynsjogge dat it allegearre mar betreklik is en dat je mei earlik wêze miskyn wol in partij ferlieze mar der úteinlik mear mei winne.

Fansels wie Cor Binsma ek doe unyk mei syn tajaan fan in ferkearde slach. Want dat it der eartiids ek wolris oars om en ta gie stie yn de Ljouwerter Krante fan 17 july 1933. “ ‘t Was kaatsen te Wirdum en H.I.  44 jaar, arbeider te Wirdum stond met een maat in het perk. Onder de toeschouwers bevind zich ook A. Berger, die met I. op een niet al te besten voet stond. Bij het kaatsen beging I. een kleine onregelmatigheid, die niet door de keurmeester, maar wel door Berger werd geconstateerd. ‘t Bestuur riep toen: “een nieuwe bal”. Hierop werd I. zo woedend, dat hij Berger uitschold voor al wat leelijk was. Hierop werd Berger kwaad en wilde I. te lijf. En dat zou ook gebeurd zijn als vier man Berger niet hadden vastgehouden. Deze verzekerde bewaring achtte I. echter niet afdoende. Hij trok de klomp uit en ging Berger hiermee te lijf en met zoo’n kracht, dat er een dokter aan te pas moest komen. “

Dêr bliuwde it net by. It kaam ta in proses ferbaal en Berger moast foarkomme. De rjochter feroardiele him ta in boete fan 10 gûne of 10 dagen finzenis.  En soks allegear om in frisse bal.

V.l.n.r.: Sietse Bijlsma (Franeker), Corrie Binsma (Apeldoorn) en Ate Monsma (Bolsward). De prijswinnaars bij de heren in de leeftijdscategorie van 51 t/m 60 jaar op de KNKB-jubileumkaatspartij te Huizum in 1987.

Foto: http://www.kaatshistorie.nl/

Hjerstkeatsen

Keatsmoffen wachtsje ynfette

op nije tiden fan gloarje

In mem naait medaljes

oan in fersliten findel

Keatslinen krije yn 'e hjerstsinne

har gerak en kleur werom

Keatskrânsen wurde wer

ta keale wylgehoepels

De tiid lûkt linen

fan doe nei skielk

Wat he se no wer betocht?

Tiisdei te jûn 20 maart hienen we ús jierlikse foarjiersgearkomst fan de pleatslike keatsferiening. We ha in warber bestjoer dat allemachtich syn bêst docht om oer alle einen en kanten it keatsen libben te hâlden. Dit jier mar leafst in list mei twaentweintich (!) keatsaktiviteiten wêrûnder njoggen foar de bern. Fan Pankoekkeatsen oant Olympysk keatsen en fan Lytse PC oant Iepen Kampioenskip Pearke Teatsen. In prachtich klupblêd, in nije webside, nije trainingspakken foar de jeugd en noch altiten “swarte sifers” op de jierrekken. In feriening dêr’t je as lid grutsk op wêze kinne.

Mar de stimming yn de gearkomst waard der by punt 8 fan de wurklist net better op. By it punt KNKB-saken krigen we “vers van de pers” it nijs dat it Bûn mei in “bekerkompetysje” komt foar ôfdielingspartoeren. Dizze “FRIESLAND BANK CUP moat krekt as by it fuotbaljen ferspile wurde yn trije of fjouwer foarrondes en de oerbleaune ferienings spylje de finaleronde yn Dronryp. De foarrondes moatte spile wurde by ien fan de dielnimmende ferienings. De winnende feriening krijt in bedrach, sawol bij de manlju as de froulju, fan mar leafst  € 1500.-- en foar de twadde en tredde priis is in bedrach beskikber fan € 1000.—en € 500.--. Gjin gekke bedragen foar ferienings mei topkeatsers. It gehiel moat al starte foar it begjin fan it keatsseizoen op woansdei 18 april en de finaleronde is feststeld op sneon 15 septimber.

By fragen út de seal dy bliken dat ús bestjoer fan neat wist. Sels hie ik mei de foarsitter begjin maart op it ledeberie fan de KNKB west en ek dêr wie der mei gjin wurd oer praten. Ut in belrûntsje lâns in pear oare ferienings dy bliken dat dy ek net ynformearre wienen. It komt allegearre as in tongerslach by klearljochte dei.

Yn in begeliedend skriuwen fan de KNKB stean in pear foardielen foar publyk en keatsers dêr’t my de lever fan begjint te kideljen. Ik sil in oantal hjirnei behannelje en in pear kanttekens by pleatse.

1. Goede en serieuze voorbereiding op kaatsseizoen.  Amahoela... tinke se no echt op it Bûnsburo dat de ledekeatsers fan Mantgum, Weidum, Jorwert en al dy oare lytse ferienings no al yn de rin fan maart begjinne te trainen foar in partijtsje keatsen yn april?

2. Goede ontwikkelingsmogelijkheden voor eigen team. Hoe fersinne se it!  Us eigen ledekeatsers dogge al mei oan de Greidhoekekompetysje, de pelotekompetysje, it pelotekampioenskip, it ledekeatsen op freed tejûn en dernjonken wolle we ek graach dat se meidogge oan strjittekeatsen, famyljekeatsen, merkekeatsen, Pearketeatsen, Barbequekeatsen, Blomkepartij, Trije kear Lotsjen Partij, Ids van der Ende Partij en de Mienskipspartij. Dêrnjonken kinne ús keatsers as se wolle hast elk wykein wol terjochte by keatsen yn buordoarpen of op KNKB partijen. Sparringpartners en ûntwikkelingsmooglikheden genôch soe’k sizze.

3. Meer binding met eigen supporters en publiek. Tinke se by it Bûn no echt dat ús leden massaal nei it keatsfjild komme as ús ledekeatsers tsjin in toppartoer út St. Jabik of Dronryp keatse? Se komme earder as Mantgum tsjin Jorwert keatse moat yn de pelotekompetysje. Dêr ha se wat mei. Mar mei in ynmaakpartijtsje yn de “FRIESLAND BANK CUP” krije de keatsers echt gjin bining mei har supporters.

4. Kans op it winnen van een hoofdprijs. Dat sil de keatsers woarst wêze! It prizejild giet ommers nei de feriening. It is sels mooglik dat topkeatsers wegerje sille om hjir oan mei te dwaan, want se moatte it wykein ek wer. Mooglik dogge se allinnich mei as se de helte sels hâlde meie. En woenen we net komme ta minder wedstriden foar de topkeatsers?

Ek de oare optochte foardielen ha in heech fantasijgehalte. Saken as ekstra opbringsten út catering (ien oerke keatse, bakje kofje en gau nei hûs!) spanning, belutsenheid en seleksjemooglikheden binne allinnich realistysk foar tsien of tolve (grutte) ferienings mei topkeatsers. Foar it grutste part fan de meast lytse ôfdielings slacht dit as in tange op in baarch.

En dan noch wat. Hoe komt it mei de status fan ús besteande NK foar senioaren?  Yn it ferline hie dit de binende namme fan BÛNSPARTIJ. In wedstriid dêr’t lytse feriening ek neat te sykjen ha, mar as je middeis noch op it Sjûkelân stean, is de dei goed. Boppedat hat it fan âlds ek in heech famyljegehalte. It Bûn as keatsfamylje dy’t ienris yn it jier by inoar komt. Je dogge dan as lytste út de grutte famylje gewoan mei, ek al ha je gjin inkele kâns op in priis. Dizze mei jild optúgde FRIESLAND BANK CUP set ús besteande Bûnspartij dy’t fan âlds de ôfdielingspartij wie, yn it skaad. Hjir sjit it Bûn yn syn eigen skonk.

En wêrom is der gjin kontakt opnaam mei de organisatoaren fan De Greidhoeke kompetysje? Dizze ferienings stekke harren nekke út mei in inisjatyf om benammen it keatsen “yn de breedte” te stimulearjen. In ôfdielingspartij foar froulju, junioaren en manlju senioaren, meast ledekeatsers mei as doel, net om in grut jild bedrach te winnen, mar om te keatsen. Om mei inoar wille te meitsjen, foar bining tusken minsken op lokale skaal. Om’t De Greidhoekekompetysje ek in ôfdielingswedstriid is, kin ik mei foarstelle dat de inisjatyfnimmers fan dizze partij harren flink ôfsketten fiele.

Ta beslút. Yn Bûnsfermiddens wurdt faak praat oer draachflak, oer bining, oer iepenheid, oer mei inoar. Dêr is yn dit gefal hielendal neat, mar dan ek neat fan te merken. Ha we fan Wiebe Wieling no net opstutsen dat bining, belibbing en mienskipssin net te keap is mei jild?

Trije Amearikanen yn 1930 op ‘e list yn De Ryp

It bart net sa faak dat keatsers fan bûten de lânsgrinzen oan keatspartijen yn Fryslân meidogge. Yn de earste twa desennia fan de 20^ste ieu wienen der mei regelmaat “ynternasjonale” keatsmoetings en dienen der yn ferskillende gearstallings Belgen mei oan keatspartijen. Ferneamd is yn dat opsicht de PC oerwinning fan 1917 troch de Belgen August van Lierde, Emile Hoyois en George Herphelin.

Mar trije Amearikanen dy’t oan in keatspartij meidogge en dan ek noch wol op in ôfdielingspartij dat is by myn witten mar ien kear fertoand. It barde op snein 13 juny 1930 yn De Ryp. “Het was een kalme Zondag op kaatsgebied gisteren, geen enkele groote wedstrijd; hiervan maakte “Sjirk de Wal” gebruik om een wedstrijd van afdeelingsparturen in te leggen. De slechte weersomstandigheden van daags te voren hadden plaats gemaakt voor uitstekende kaatsweer, dus kon een goede wedstrijd worden verwacht, ook omdat de lijst vele goede parturen bevatte.” http://tinyurl.com/7qvl25m

Der stienen 15 partoer op ‘e list mei sterke dielnimmers út Bitgum, Ljouwert, Huzum, Dokkum, St, Jacob, Wytmarsum, en Harns. Alle toppers út dy tiid dienen mei. En dan stie dêr sa mar in partoer tusken mei IJ. Smid, T. de Jong en H. Joustra út Paterson yn Amearika. Hja wienen lid fan keatsferiening U.T.Y.  dat betsjutte “Untspanning Troch Ynspanning”. De mannen koenen it net risse tsjin C. Tijssen, D. Ganzinga en H. Park fan de organisearjende feriening. De LC skriuwt: “De internationalisten uit Paterson zijn niet in staat het te bolwerken. Zij zijn allen van Friesch origine en hunne deelname zal meer als een attractie zijn bedoeld. In vroeger jaren was o.a. Smid, afkomstig uit Dronrijp een zeer goed speler. De tegenstanders zijn op eigen terrein de baas en gunnen de Amerikanen niet meer dan een 1 spel.”.

It wie net de ienichste keatspartij dêr’t de “Amearikanen” har dat fearnsjier sjen lieten. Want ek yn Mantgum, Wiuwert, Britswert, Itens, Bitgum en sels Aldebiltsyl stienen de mannen út Paterson op ‘e list. De Jong wûn sels yn Itens, Britswert en Aldebiltsyl in priis. Yn Mantgum stelden se mei-inoar de prizen beskikber foar in jongespartij. En foar in senioarepartij skonk de emigrant M. Fransbergen sels fjirtich gûne.  http://tinyurl.com/6mamm8o

Dizze Fryske emigranten lieten har yn 1928 fotografearje nei ôfrin fan har jierlikse keatswedstriid yn Rochester.  Links it partoer út Paterson mei Theunis de Jong, Lou Zijlstra en Sam Riemersma. It rjochter partoer mei Sibolt de Jong, Freerk Taconis en Bertus de Wolf kaam út Rochester. Yn it midden Pier Meintema mei medalje.

Foto: http://www.tresoar.nl/

It keatsen libbe yn Paterson. Yn de LC fan 23-6-1930 http://tinyurl.com/7ssawbu  stiet in ferslach fan in keatspartij yn Paterson. Der kamen mar leafst 75 dielnimmers op of. En it is ek bekend dat de keatsferienings fan Rochester en Paterson yn dy tiid elk jier in kear yn beide plakken tsjin  elkoar keatsten. Doe’t in Amerikaanske sjoernalist dy’t it spultsje fansels nea earder sjoen hie, dêr in ferslach fan makke skriuwde hy dat dizze sport “kear um bliksum” neamt waard. It is dêrmei dúdlik dat ek de keatstaal mei ferhuze nei “It lân fan dream en winsken”.

De Fryske Amearikanen gienen mei in opmerklike keatspriis wêrom nei Paterson. Hja lieten by Juwelier Bolman yn Ljouwert in sulveren wikselpriis meitsje. De priis bestie út in skyld mei in keatser en in tillegraaf en ûnder it skyld in lytse sulveren keatsbal. It gehiel moat blykber de muoite wurdich west ha want Bolman prizige yn in advertinsje sels oan dat it yn syn etalaazje te besjen wie. http://tinyurl.com/7l55kj5

Tjalling van den Bosch al op jonge leeftijd “uitblinker”.

Achlumer Tjalling van der Bosch is het meest bekend vanwege  zijn deelname aan de krachtsport.  In die sport werd hij ooit “Sterkste Man” van Nederland. Maar Tjalling is daarnaast een verdienstelijk dammer en deed namens Kaatsvereniging Achlum ook een aantal keren mee op Bondswedstrijden.

Minder bekend is zijn optreden op vierjarige leeftijd als “fluitist” in de pauze voor de finale van de Freulepartij in 1959. Bij mijn weten is zijn fluitspel niet tot grote hoogte gestegen en is het in de muziek bij dit ene optreden gebleven. Maar gevoel voor theater zat er blijkbaar al jong in.

Bron: Leeuwarder Courant, 6 augustus 1959.

Rients Gratama tachtich

Tiisdei 23 jannewaris wurdt Rients Gratama 80 jier. In leeftyd wêrby de measte minsken it ark fan it deistich wurk al lang dellein ha. Of om yn keatstermen te bliuwen, de mof hinget dan by de measten al yn de wylgen. Sa net by ús Rients. Noch dizze moanne brocht er mei syn libbensgesel Carla van der Heijde in berneboekje út “Hein en syn Hin”.  It is in prachtich foarbyld fan it multytalint dat Rients is. Op syn webside www.rientsgratama.nl neamt er himsels: “cabaratier, acteur, schrijver, dichter, presentator.”

Mar Rients is ek keatser. Fansels net sa’n grutten dy’t rom en gloarje by inoar slein hat op Freule, PC of Bûnspartijen. Mar elkenien dy’t keatst (hat) en him keatser fielt, is keatser. En sa is it ek mei Rients. Yn syn jeugd hat er folop keatst en meidien oan de Freule. Yn De Keatsfreon fan 2005 seit er dêr oer yn in ynterview mei Baukje Wytsma: “Doe’t ik op 11 augustus 1948 meikeatste op de Freulepartij yn Wommels, wie dat foar my ek in belevenis, ek al rekken wy der yn de twadde omloop ôf. Wy wiene kânshawwers, mar ferlearen fan Berltsum as it my net mist. Reduzum wûn de partij, mei lytse Uilke Tolsma as balkearder. Soks ferjitst noait wer.”

Keatsen as teater, it Sjûkelân as skouboarch. In reden werom Rients hast nea yn Frjentsjer ûntbrekt op de jierlikse heechtij dei fan it keatsen. Net yn de pommeranten tribune, nee gewoan op de earste rige fan de banken rûn it fjild. Dêr tusken syn eigen folk fan mannen mei platte pet en froulju  mei kofje en broadsjes fielt er him thús. Rients is dan Rients en as de pûde mei King pipermuntsjes rûn giet, dielt er like hurd mei as elkenien.

Op de site www.kaatshistorie.nl fûn ik bygeande foto. It is Rients mei Hilbert Dijkstra en Dirk Yde Sjaarda. Hja dienen mei yn de revu by it 100 jierrich bestean fan de KNKB yn 1997. As promoasje spilen sy in partijtsje tsjin de âlde keatskrigers Hotze Schuil, Aebe Haima en Frans Helfrich. Ik wit net as Rients yn 2009 ek op de PC west hat, mar it hie fansels prachtich west as hy op dy dei tsjûge west hat fan de twadde priis dy’t Dirk Yde dat jier behelle op de PC.

It is te hoopjen dat we Rients noch faak sjen meie op de keatsbanken en dat er him noch  in moai oantal jierren keatser neame kin.